Tutur

Susunen masyarakat Karo ngikuti garis keturunen arah bapa (patrilineal) bagepe garis keturunen arah nande (matrilineal). Tutur ibas kalak Karo itarik ibas cibal sekalak jelma ibas garis keturunen enda, sitersena bagi arah teruh enda:

Tutur

Rikutken kecibal si e, maka sada jabu tah pe merga tertentu (igelari sukut) ikeleweti sangkep nggeluhna si igelari “Rakut Sitelu” ibas kalak Karo emekap: Senina, Kalimbubu, ras Anakberu bagi gambar i teruh enda:

Rakut Sitelu

Tutur siwaluh (ibas sienda kurang denga pengangkan kami erkiteken lenga dat kami jumlah si payo 8), ipebelang ibas rakut si telu ndai, emekap:

1. Senina si seh (langsung) ku Sukut, lit dua, eme:
   1. Sukut/Sembuyak, eme senina sada nande sada bapa,vsada nini, sada empong, tah sada sub-merga. Ibas dahin adat, sukut eme si mada kerja/dahin, ras sembuyak teman arih-arih.
   2. Senina/Gamet (Sikaku Ranan), eme senina sada merga, banci sada sub-merga tah lain sub-merga rikutken kebiasaan si lit. Ibas dahin adat, senina enda dahinna eme juru-bicara si mada kerja, kelang-kelang man anakberu.
2. Senina si erkelang ku Sukut, epe litka dua terpuk, eme:
   1. Senine sepemeren ras senina separibanen. Senina sepemeren eme senina erkiteken nandenta ersenina. Senina separibanen eme senina erkiteken ndeharata ersenina. Ibas dahin adat, senina separibanen tahpe sipemeren jadi kelang-kelang Kalimbubu si mada dahin ngerana ras anakberu.
   2. Senina sepengalon ras senina sendalanen. Senina sepengalon eme senina erkiteken kelanta ersembuyak. Senina sendalanen eme senina erkiteken impalta jadi ndeharana.
3. Kalimbubu si seh (langsung) ku Sukut. Rikutken tingkatenna, banci ka enda jadi bagi arah teruh enda:
   1. Kalimbubu iperdemui, eme orangtua tahpe turang ndeharata. Ibas dahin adat, Ia sierkimbangh ras simaba ose.
   2. Kalimbubu simada dareh, eme orangtua tahpe turang nandenta. Ibas kerja nerehken igelari kalimbubu singalo bere-bere, ibas dahin ceda ate igelari kalimbubu singalo maneh-maneh/morah-morah/sapu iluh. Dahinna eme ngampeken ose.
   3. Binuang, eme kalimbubu simada dareh bapanta. Ibas dahin mengket rumah igelari kalimbubu simajek daliken.
   4. Kampah, eme kalimbubu simada dareh nininta. Igelari pe kalimbubu bena-bena.
   5. Kalimbubu Tua, eme kalimbubu siterus rindik-indik iperdemui.
4. Kalimbubu si erkelang ku Sukut.
   1. Puang Kalimbubu, eme kalimbubu ibas kalimbubunta. Ibas dahin adat igelari pe kalimbubu singalo perkempun, singalo pernini, tahpe singalo ciken-ciken.
   2. Puang Nu Puang, eme kalimbubu ibas puang kalimbubunta. Igelari pe soler.
   3. Kalimbubu sepemeren, eme kalimbubu erkondangken senina sepemeren.
5. Anakberu si eh (langsung) ku Sukut. Rikutken tingkatenna, banci ka enda jadi bagi arah teruh enda:
   1. Anakberu angkip/ampu, eme kela tah silih si e denga muat dirinta.
   2. Anakberu dareh/ipupus, eme anak sinipupus dirinta. Igelari pe bere-bere tah impal.
   3. Anakbero cekoh baka, eme anakberu si enggo dua kali muat dirinta, entahpe kita binuangna. Ibas kerja adat, dahinna eme peseh tenah man kalimbubu simaba ose ras nikapken nakan baluten/kehamaten.
   4. Anakberu cekoh baka tutup, eme anakberu si enggo telu kali muat dirinta, entahpe kita kampahna. Ibas kerja adat, dahinna seri ras anakberu cekoh baka.
   5. Anakberu Tua, eme anakberu si enggo empat kali rindik-rindik muat dirinta. Ibas kerja adat, ia me siertanggung jawab ras jadi singerana.
6. Anakberu si erkelang ku Sukut.
   1. Anakberu minteri, eme anakberu ibas anakberunta. Ibas kerja adat, dahinna eme pelaksana guna ndungi dahin ras pepinter kalimbubuna ngerungguken adat.
   2. Anakberu ngukuri, eme anakberu ibas anakberu minterinta.
   3. Anakberu singikuti, eme anakberu ibas anakberu ngukurinta.
   4. Anakberu pengapit, eme anakberu ibas anakberu singikutinta.
   5. Anakberu sepemeren, eme anakberu ibas senina sepemerenta.

Ibas piga-piga sumber tutur siwaluh i simpulkenna bagi arah teruh enda:

1. puang kalimbubu
2. kalimbubu
3. senina
4. sembuyak
5. senina sipemeren
6. senina sepengalon/sedalanen
7. anak beru
8. anak beru menteri

Ija akapndu kurang payona, danci iberekenndu komentar ras sumberna gelah danci i cross check kami.